Николаева Азалия Георгиевна (1939 с.) Таатта оройуонун Саһыл нэһилиэгин "Жданов" холкуоска сэрии сылларын иннинэ төрөөбүт. Онон сэрии сылларын ыарахан олоҕун эҥэринэн тэлэн улааппыт Ася кыыс, кыра сааһыттан барыны-бары болҕойон көрө-истэ улааппыт буолан, сэрии сылларын бүтүүтэ Кытылын дьонун-сэргэтин барыларын билбит, хайа ыал ханан олорбутугар уонна тугу үлэлээбиттэригэр тиийэ. Сырдыкка-кэрэҕэ тардыһан, үөрэхтэнэн өр сылларга Дьокуускай куоракка Тыа хаһаайыстыбатын министерствотыгар Статистика управлениетыгар үлэлээбит. Билигин 80-чалаах ытык мааны РФ Үлэтин ветерана буолан, Кыайыы 75 сыллаах өрөгөйүн этэҥҥэ көрсөөрү Дьокуускай куоракка олорор.