Анна Никифоровна Пермякова (Баишева) 1903 сыллаахха Мэҥэ-Ханалас Дьабыыл нэһилиэгэр "Бараайы" алааска олохтоох Варвара Дмитриевна уонна Никифор Захарович Баишевтар дьиэ кэргэннэригэр төрөөбүтэ. 19 сааһыгар Чаачыгыйтан төрүттээх Пермяков Иннокентий Ивановичка кэргэн тахсыбыта. Сэрии иннинэ «Чаачыгый» холкуоска, фермаҕа ыанньыксытынан, үүт тутааччынан үлэлээбитэ, кэргэнэ сылгыһыт этэ. Сэрии буолбутугар улахан уоллара Василий-I Иннокентьевич Пермяков 1942 сыл атырдьах ыйын 3 күнүгэр Аҕа дойду сэриитигэр ыҥырыллыбыта. Кэбээйигэ көскө түөрт оҕолорун ( Настя 1932с, Афоня 1935с, Октябрина 1937с, Вася 1940с) уонна убайдарын Пермяков Афанасий Иванович икки о5отун Таняны уонна Асамы илдьэ барбыттара. Кэргэнэ “Таас тумустан” олохсуйуохтаах “Аалгыма” диэн сирдэригэр, мууһуран эрэр үрэх устун малларын, оҕолорун оҥочонон соһон тиийэт улаханнык ыалдьан балыыһаҕа киирбитэ. Эбээбит мунха биригээдэтигэр киирэн балык булдугар сылдьыбыта. 40 км ыраах сытар “Тааныма” диэн күөлгэ, 2 мунханан 30 буолан үлэлииллэрэ. Күөл кытыытыгар үүтээҥҥэ, сорохтор балааккаҕа олорон нэдиэлэнэн хоно сылдьан тардаллара. Оҕолоро аймах оҕонньору кытта бэйэлэрэ хаалаллар эбит. «Саҥа олох» хаһыатка Иван Понамарев суруйбутуттан быһа тардан киллэрдэххэ: «...Кэбээйигэ көһүүгэ тиийбиттэригэр аччыктааһынтан аймах уоллара Асам уонна 5 саастаах кыыһа Октябрина сор суолламмыттара. Мааннык буоллаҕына бары да өлүүһүкпут дьиэн, 1943 сааһыары 7 саастаах Афонятын Куокуйтан Кэбээйигэ салаасканан соһон, арыый да сэниэлээхтик олорор быраатыгар Серафим Баишевтаахха илдьибит. Саха дьахтарын тулуурун, дьулуурун киһи сөҕөр эрэ! Бэйэтэ аччык аҥардаах сылдьан сэттэ көс кэриҥэ сири соҕотоҕун соһон илдьэн тыыннаах хааллардаҕа». Сайын сааһыгар оттоммотох дулҕалаах сири оттообуттар колхоз аҕыйах ынаҕар. Иккис кыһыннарыгар быраата Баишев Петр Петрович Кэбээйигэ оскуолаҕа оһох оттооччу үлэтин булан биэрэн абыраабыта. Соҕотоҕон мас хайытан 9 оһоҕу оттор этэ. Киһи илистэр, ыарахан үлэтин эдэр уонна кыанар буолан тулуйдаҕа.
1944с. Көһүүттэн кэлэн баран Дьабыл нэһилиэгэр аһыллыбыт детдомҥа, онтон сэттэ кылаастаах оскуолаҕа остуорастаабыта, оҕонньоро оһох оттооччу этэ. 1951 сыллаахха оҕолорун салҕыы үөрэттэрэри Майаҕа көһөн киирэн Промкомбинатка остуорастаабыта. Түөрт оҕолорун барыларын үөрэхтээбиттэрэ: Улахан Баһылай, Анастасия кооперативнай техникуму, Афанасий Благовещенскайдаа5ы медицинскай институту, кыра Баһылай Усурийскайдаа5ы тыа хайаайыстыбатын институтун бүтэрбиттэрэ. 1957 сыллаахха Чурапчыга кыыһыгар Анастасия Иннокентьевна олохсуйбута. Дьиэ ис-тас үлэтигэр тэнҥэ сылдьыһара, өссө эбиитин оройуон киинигэр сүөһү иитэллэрэ. Күтүөтэ эрдэ өлөн сиэннэрин Мишкиннары көрсөн улаатыннарбыта, үөрэхтээн, барыларын ыал онортоон хос сиэттэрин көрөр дьолу билбитэ. Анна Никифоровна «Аҕа дойдуну көмүскүүр Улуу сэрии 1941-1945 сылларга килбиэннээх үлэтин иһин» мэтээллээҕэ. Эбээбит сырдык мөссүөнэ, амарах дууһата, биһиги өйбүтүгэр, сүрэхпитигэр өрүү баар буолуоҕа, кини дьоһун олоҕун оҕолоро, сиэннэрэ, хос сиэннэрэ салхыыллар.
