Мин хос эбэм Копырина Фекла Алексеевна 1905 с. Усть - Алдан улууһун Өнөр нэһилиэгэр элбэх оҕолоох Ульяна, Алексей Атласовтар дьиэ кэргэттэригэр 17 оҕонон төрөөбүтэ. Урукку кырыымчык олоххо 6 оҕо улаатан киһи хара буолбуттара. Саҥа улаатан истэхтэринэ аҕалара күн сириттэн барбыта. Бу кэмҥэ улахан эдьиийдэрэ Марфа  кэргэн тахсан Кэптэнигэ олороро. Онон ийэлэрин кытта хос эбэм быраатынаан Уйбаанныын Кэптэнигэ көһөн кэлбиттэрэ. Иккис эдьиийэ улахан Сүөкүлэ эрдэ күн сириттэн баран, кини кыыһын Маайаны бэйэлэрэ илдьэ сылдьаллара. Кэптэнигэ көһөн кэлэн, колхозтааһын саҕаланыаҕыттан 1949 с. дылы колхозка ыанньыксытынан үлэлиир.Сэрии кэмигэр эбэм тыылга Улуу Кыайыы туһугар үлэлэспитэ. Копырин Семеҥҥэ кэргэн тахсан 4 оҕоломмута.

   Бу кэмнэргэ уһун сылларга от үүммэккэ, ыарахан сут кэмнэр буолбуттар.  Онон Намҥа сүөһүлэрин сыл таһаараары күһүн кыстыы киирэллэр эбит. Сүөһүлэрин бэйэлэрэ үүрэн, ньирэйдэрин батыһыннаран, таһаҕастарын оҕус сыарҕатыгар тиэйэн   киирэн кыстыыллар. Саас төттөрү дойдуларыгар тахсаллар.  Хос эбэм эбээбэр кэпсииринэн Нам Хайгыалааҕар киирэн кыстыыллар эбит. Хайгыалаахха наһаа үчүгэй ыалга дьукаах олорон тыыннаах хаалбыппыт диэн кэпсиир эбит. Дьукаах оҕонньор кыһынын куобахха туһахтаан, ону мииннэнэн аһаан олорбуттар.  Сайынын сүөһүлэригэр бэйэлэрэ ыам икки ардыгар тахсан оттууллар. Ынахтарын бэйэлэрэ бостууктааннар күҥҥэ түөртэ ыыллар. Эбэбэр Мария Егоровнаҕа  хос эбээбитин кытта бииргэ үлэлээбит дьон кэпсииринэн, хос эбээбит Сүөкүлэ туохтан да толлон турбат хорсун үлэһит эбит. Улахан сементал оҕус быкка ыстарбытын уһун кыһыны быһа солох оргутан сууйан - тараан, быттаан, ыраастаан үчүгэй оҥорбут.Ол саҕана сүөһү өллөҕүнэ, сүөһү көрөөччүлэр улахан сэмэҕэ тардыллаллара. Бу кэмнэргэ хос эбээбит быраата Уйбаан хонууга  биригэдьиирдии сылдьан, 1942 сыллаахха иккис хомуурга сэриигэ ыҥырыллан барбыт. Таайбыт Уйбаан уоттаах сэрииттэн эргиллибэтэх. Хос эбээбит Фекла Алексеевна, таайбыт Иван Алексеевич Атласов эйэлээх олох иһин бэйэлэрин күүстэрин биэрэн охсуспуттара.

   Өйдүүбүт, саныыбыт, махтанабыт күндү дьоммутугар.                                                                                                                                                                                                                                                                                                                                                    Хос сиэнэ Жиркова Дайана