Эhэбит, Токусаров Данил Дмитриевич 1892 сыллаахха, Ньурба улууһун Омолдоон нэһилиэгин, Мунду Күөл түөлбэтигэр, тоҕус оҕолоох Токууһаларга, бастакы оҕонон төрөөбүт.
1941 сылга 49 сааһын туолан уонна ыалдьан сэриигэ ыҥырыллыбатах. 5 бырааттара утуу субуу сэриигэ ыҥырыллан барбыттара. 1941 сылга маҥнайгы ыҥырыыга саамай кыра быраата Дмитриев Дмитрий ( Миитэккэ) барбыт, 1942 с сураҕа суох сүттэ диэн сурук кэлбит. Ленинград таһыгар өлбүтүн следопыттар булбуттар.
Эһэм Омолдоон нэһилиэгэр Куйбышев аатынан холкуоска оҕуруот биригэдьииринэн үлэлээбит. Аҕатынаан Дмитриев Дмитрийдиин ( Токууһа) сэрии ыар кэмигэр бырааттарын кэргэттэрин илдьэ, бары бииргэ өтөхтөрүгэр Мунду күөлгэ олорбуттар. Эһэм үлэтин быыһыгар, дьонун аһатаары эриэппэни, түрнүөпүһү ойуурга ыһар эбит, ону үргээн сиэннэр айахтарын ииттинэн олорбуттар.
Онон сэрии бириэмэтигэр аччыктаабакка бары тыыннаах хаалбыттар.
Кэлин кийииттэрэ махтанан, эhэ5ит Дайыла баар буолан биһиги тыыннаах хаалбыппыт диэн махтаммыттара. Эhэбит сэрии ыар кэмигэр олус муударайдык дьаһанан, дьонун аймахтарын көрөн истэн олорбут эбит диэн билигин саныыгын. Кыайыыны уһансыбыт, олохторун толук биэрбит ытык дьоммут сырдык ааттара хаһан да умнуллуо суоҕа диэн эрэнэбит.

Эһэм 1983 сыллаахха өлбүтэ, кини лабырыайын билигин да саныыбыт.
Эһэбит бастакы кэргэниттэн 3 оҕолоох, иккис кэргэниттэн 2 оҕолоох. Билигин сиэннэрэ, хос сиэннэрэ, хос - хос сиэннэрэ бааллар.

Сиэнэ Тихонова София Васильевна ахтыыта.