Биһиги аҕабыт Семенов Семен Федотович 1932 сыллаахха Дьөккөнтөн биир көстөөх "Алаас" диэн сиргэ Матрена Ефимовна уонна Федот Семенович (Хатыҥыр Сөдүөт) Семеновтар дьиэ кэргэттэригэр төрөөбүтэ. Дьонугар соҕотох оҕо этэ. Оччотооҕу кыаммат-түгэммэт үйэҕэ, кытыы сиргэ олорор холкуостаах олоҕо,күннээҕи түбүгэ тыыннаах буолар туһугар хатыыппайдаһыы буолара. Онон оҕону иитэргэ да, үөрэттэрэргэ да элбэх моһуоктардааҕа өйдөнөр суол. Хойут эбэбит: "Уолбун үөрэттэримээри сааһын кыччаппытым, инньэ гынан оҕобут оскуолатааҕы үөрэҕэ 3 кылааһынан муҥурдаммыта" диэн кэпсиирэ. Эһэбит Федот Семенов «Коминтерн» холкуос тутаах үлэһитэ, Аҕа дойду Улуу сэриитэ саҕаланарыгар 40 саастаах эбит. Сэриигэ 1943 сыллаахха ыҥырыллан барбыт уонна эргиллибэтэх, 1944 сэтинньитигэр өлбүт, ханна көмүллүбүтэ биллибэт. Аҕабыт 11 сааһыгар тулаайах аҥаардаах хаалан, аас-туор олох ыарахаттарын толору билбит. Оччотооҕу байыаннай балаһыанньа оҕотуттан-улаханыттан тутулуга суох сыраны-сылбаны быһар үлэни ирдиирэ. Аҕата, атын да билэр-билбэт дойдутун дьоно өлүүлэрэ, сэрии суоһа-суодала, сут дьыл, оонньооботох оҕо сааһа таайан доруобуйатыгар да оҕустардаҕа. Сэрии кэнниттэн кыһыннары-сайыннары хаһан да бүппэт холкуос, сопхуос араас үлэлэригэр сылдьыбыта: тутууга, сүөһү көрүүтүгэр, от-мас бэлэмнээһинигэр. 1987 сыллаахха пенсияҕа тахсан баран нэһилиэк баанньыгар оһох оттооччунан уһуннук үлэлээбитэ. Аҕабыт аһара улгум, бэрт холку майгылааҕа, биһигини мөҕө-этэ сылдьарын олох өйдөөбөппүт. Билигин санаатахпытына олоҕор ыарахан түгэннэр элбэх эбиттэр. Биһиги олох кырабытыгар ийэбит, онтон бырааппыт өлбүттэрэ.Олох оскуолатын, аһыытын - ньулуунун барытын ааспыт буолан эбитэ дуу, төттөрү түһэн хаалбакка, эбэбитиниин биһигини иитэн киһи гыммыттарыгар хаһан төлөммөт иэстээх эбиппит. Аҕабыт Семен Федотович тыыл, үлэ бэтэрээнэ этэ. 1948 с. балаҕан ыйын 25 күнүгэр №0114902 "Аҕа дойдуну көмүскүүр Улуу сэрии 1941-1945 сс. килбиэннээх үлэтин иһин" мэтээлинэн наҕарадаламмыта.  2003 сыллаахха тыыл бэтэрээннэрин сэрии бэтэрээннэригэр тэҥнээбиттэригэр олус үөрбүтэ. 2005 сыл кулун тутар 7 күнүгэр 73 сааһыгар олохтон туораабыта.

Кыргыттара Людмила Шамаева, Люция Капитонова. Бүлүү улууһа.