Биһиги аҕабыт, эһээбит, хоту көһөрүллүү кыттыылааҕа, тыыл, үлэ бэтэрээнэ, Чурапчы сэлиэнньэтигэр олорбут Захаров Николай Егорович 1926 сыллаахха ахсынньы 13 күнүгэр Чурапчы оройуонун Төлөй нэһилиэгэр Оҕус баһа диэн сиргэ биэс оҕолоох дьадаҥы колхозтаах дьиэ кэргэнигэр үһүс оҕонон төрөөбүтэ, Төрөппүттэрэ - Прасковья Петровна, Егор Петрович Захаровтар, Иван, Петр диэн убайдардааҕа, Паша -соҕотох балта, быраата Гоша. Көһөрүүгэ ыытыахтарыгар дылы колхозка от, бурдук үлэтигэр, фермаҕа үлэлэспитэ. 1934с. Төлөй оскуолатыгар 1 кылааска киирэн, 5 кылааһы бүтэриэр дылы, онтон Мугудайга салгыы үөрэнэр, 6 кылааска Кэбээйигэ тиийэн үөрэнэр, салгыы усулуобуйа суох буолан, үөрэхтэн тохтообут.
1942с.күһүн күүс өттүлэринэн көһөрүллэн биһиги дьоммут ""Калинин"" колхозтара Кэбээйигэ Тыайа нэһилиэгэр тиийбиттэр. 1943с.-тан күөл, өрүс муҥхатыгар балык биригээдэтигэр, кыһынын күндү түүлээҕи бултааһыҥҥа үлэлэспит. Сэрии кэмигэр бултаммыт балык барыта фроҥҥа барар, сиэниллибэт, бултаммыт государствоҕа туттарыллыбыт түүлээх таҥныллыбат, кытаанах кэмэ этэ. Балык заводугар күндү түүлээх былаана эмиэ түһэрэ. Аҕабыт 1945-46сс. кыһын түүлээх соноругар республикаҕа социалистическай куоталаһыыга киирсэн, кыайыылааҕынан тахсан, Республика Бочуотун дуоскатыгар тахсан, ""Холбостон"" ""Киров"" мааркалаах хары чаһыытынан бириэмийэлэммит, Саха АССР Совминын Илья Егорович Винокуров илии баттааһыннаах ""Саха АССР Бастыҥ булчута"" диэн свидетельство ылбыт, ону оччолорго Кэбээйи райпотун председателэ, кыһыл партизан, Кралин Алнксей Евсеевич туттарбыт. Коммунистическай үлэ ударнига, кадровай булчут буолбут. Икки күн үчүгэйдик бултуйбуппун өйдүүбүн диэччи. Өрүс арыыларыгар күндү түүлээххэ хапкаан тарҕатан баран, сырдыйыыта 1.5 көстөөх сиргэ тиийэр гына эрдэ туран барар, ытыс саҕа эрэ лэппиэскэ сыыстаах буолар. Ол күн үс кырсаны, биир саһылы, биир солоҥдону ылбыт, сүгэһэр маһыгар толору таһаҕас буолбут. Түүн 2 чааска эстэн дьиэтигэр тиийбит, дьоно кэтэһэн олороллор эбит. Иккис сырыыга үс саһылы, биир солоҥдону ылбыт. Бэриллибит былааны барытын толороро.
Балыктыыр биригээдэлэригэр сэриигэ барбат гына бронь биэрбиттэр.Өрүс туруоҕуттан кулун тутар бүтүөр дылы 40-тан тахса тонна сыалыһары туттарбыттар. Уоттаах сэрии сылларыгар Кэбээйитээҕи балык собуотугар үлэлээбит, балыктаабыт, түүлээхтээбит чурапчылар өстөөҕү үлтүрүтүүгэ киллэрсибит кылааппыт улахан этэ диэн кэпсиирэ аҕабыт.
Көһөрүү төннөрүгэр аҕалара ыалдьан, хаалаллар, ийэтинээн 1961с. дойдуларыгар төннөллөр.
Дойдутугар кэлэн, промкомбинакка дтзелиһинэн, суопарынан, механигынан, кэлин Дорожнай участокка сварщигынан үтүө суобастаахтык үлэлээбитэ, компартия кэккэтигэр 30-тан тахса сыл үлэлээбитэ, партийнай тэрилтэ секретара, профсоюз председаьелэ, норуодунай хонтуруол сэтээтэлэ этэ. Аҕабыт 2019 с. 92 сааһыгар күн сириттэн барбыта.
