Неустроева Александра Родионовна

Неустроева Александра Родионовна, төрөөбүтүнэн Акимова, 1925 сыллаахха ахсынньы ый 30 күнүгэр Таатта оройуонун I Дьохсоҕон нэһилиэгэр 9 оҕолоох дьадаҥы ыалга бэһис оҕонон төрөөбүтэ.

1933 сыллаахха Сиэллээх начаалынай оскуолатыгар үөрэнэ киирбитэ.

1940 сыллаахха төрөппүттэрэ иккиэн өлөннөр икки быраатын кытта төгүрүк тулаайах хаалбыттара. Ытык Күөл уонна Чөркөөх сэттэ кылаастаах оскуолатыгар үөрэммитэ уонна 1942 сыллаахха баран Чөркөөххө интэринээккэ иитээччинэн үлэлээбитэ.

1942 – 1945 сылларга Чурапчытааҕы педучилищеҕа үөрэммитэ.

Сэрии сылларыгар, сайыҥҥы сынньалаҥ кэмигэр, төрөөбүт сиригэр Дьохсоҕоҥҥо кэлэн «Комсомол 20 сыла» колхозка бурдук быһыытыгар, окко үлэлиирэ. Биирдэ Ааллаах Үүҥҥэ оҕуһунан таҕаһас таһыспыт. «1941–1945 сс. Аҕа дойду Улуу сэриитигэр килбиэннээх үлэтин иһин» мэтээл биэрбиттэрин кыбыстан ылбатах, миигиннээҕэр буолуох үлэлээбиттэр бааллара диэн.

1945-1948 сылларга Чурапчы педучилищетыгар техсекретарь-кассирынан үлэлээбитэ.

1948–1958 сылларга Тааттаҕа көһөн типографияҕа старшай наборщицанан үлэлээбитэ. Дьохсоҕон нэһилиэгин, Таатта оройуонун үлэһиттэрин сэбиэтин депутаттарынан талыллыбыта. 1950 сыллаахха Республикатааҕы дьахталлар конференцияларыгар делегат буолбута. Тааттатааҕы райкомол чилиэнэ. ХV Уобаластааҕы комсомольскай конференцияҕа делегат. Тааттатааҕы райисполком чилиэнэ. 1952 сыллаахха Саха АССР Үрдүкү Сэбиэтин кыраамататын ылбыта.

1965–1973 сылларга Алексеевскай (Таатта) оройуонун ГТАС бюротун сэбиэдиссэйинэн үлэлээбитэ. Алексеевскай оройуон Таатта сельскэй сэбиэтин депутата. 1971 сылга «Үлэҕэ килбиэнин иһин» мэтээлинэн наҕараадаламмыта.

1973-1976 сылларга Дьокуускайга «Союзпечать» систиэмэтигэр үлэлээбитэ. 1976 сыллаахха коммунистическай үлэ ударнига буолбута.

Кэлин «1941-1945 сс. килбиэннээх үлэтин иһин» мэтээл, «Кыайыы 50 сыла», «Сэбиэскэй Сойуус Маршала Жуков», «Улуу Өктөөп өрөбөлүүссүйэтин 80 сыла» үбүлүөйүнэй мэтээллэринэн наҕараадаламмыта.

1954 сыллаахха Неустроев Никифор Никифоровичка кэргэн тахсан 2 кыыстаммыта, 7 сиэннэммитэ, улахан сиэнэ ыал буолбутун кэннэ, орто дойдуттан 1999 сыллаахха барбыта.

Улахан кыыһа Любовь Никифоровна Петрова (Неустроева)