Александр Никифорович Аҕа дойду сэриитин кэмигэр Алаҕар нэһилиэгин «Жданов аатынан» холкуос чилиэнэ буолан, кэргэнин, үс оҕотун кытта Кэбээйигэ балык булдугар 1942-1944 сылларга көһүүгэ сылдьыбыта. Оччолорго улахан кыыһа Анна уон биир (01.10.1931), Варвара уон (1932-1997), Владимир аҕыс (1934-1980)саастаахтара. Кэбээйиттэн кэлэн баран дойдуларыгар Лампаарыкыга холкуоска үлэлээбиттэрэ. 1962 сыллаахха Уус-Алдан оройуонун Бороҕонугар уолларыгар Владимирга көһөн тиийбиттэрэ. Төрөппүттэрбит иккиэн үлэлиир буоланнар, эбээлээх, эһээбит биһиэхэ олорбуттара, биһигини көрсөллөрө, дьиэ ис-тас үлэтигэр көмөлөһөллөрө. Оройуоннааҕы ветеринарнай станцияҕа эһээм харабылынан, эбээм ветстанция хонтуоратыгар муоста сууйааччынан үлэлии сылдьыбыттара. Эһээбит Александр Никифорович, киһи быһыытынан кытаанах да соҕус буоллар, биһигини сөбүлүүр аҕай этэ. Кини бөдөҥ соҕус уҥуохтааҕа, ону-маны уһанарын сөбүлүүрэ, туһахтаах куобах аҕалара, аҕабынаан сайын аайы сүөһүлэригэр оттуур этилэр. Оһох таһыгар олорон эрэ хамса тардара, ону миэхэ уматтарара.  1964 сыл күһүөрү эһээм ыалдьыбыта уонна аҕыйах хонон баран суох буолбута.

Кинилэр үс оҕолорун дьиэ кэргэттэрэ: Федоровтар, Дарамаевтар, Баишевтар -дьоннорбут оччотооҕу ыарахан олоххо Аҕа дойду сэриитин сылларын, суту-курааны, күүс өттүнэн хоту көһөрүллүүнү этэҥҥэ туораан, тыылга кыайыыны уһансан бэйэлэрин сэмэй кылааттарын киллэрсибиттэрин оҕолорбутугар, сиэттэрбитигэр холобур гынан кэпсиэхпит, ааттарын ааттата туруохпут диэн эрэнэбин.

София Владимировна Рожина, сиэнэ,

«Үлэ ветерана», Уус-Алдан улууһа, Бороҕон с.