Семен Назарович (1904–1981), Татьяна Ивановна (1906–1978) Слепцовтар 

Татьяна Ивановна Слепцова Мэҥэ Хаҥалас оройуонугар Бүтэйдээх Куолларатыгар төрөөбүт. Ийэтэ Тарабукина (Аргунова) Елизавета Иннокентьевна, аҕата – Тарабукин Иван  Иванович.

Эбэбит Татьяна Ивановна 1928 с. Слепцов Семен Назаровичтыын холбоһон, ыал буолан түөрт оҕоломмуттар. Колхоз туһугар тугун да харыстаабакка үлэлээбитэ. Сэрии сылларыгар колхозка өрүү ыанньыксыттыыра.

1944 с. Махтал суругунан уонна 75 солк. бириэмийэлэммит. 1946 с. алтынньыга Аҕа дойдуну көмүскүүр Улуу сэрии кэмигэр «Килбиэннээх үлэтин иһин» медалынан наҕараадаламмыт. 1955 с. атырдьах ыйын 10 күнүгэр оройуон бастыҥ ыанньыксыта буолан райсовет грамотатынан бэлиэтэнэр. 1960 сылтан пенсияҕа тахсыбыт. Таһаарыылаах үлэтин иһин 1975 с. Мэҥэ Хаҥалас оройуонун Бочуотун кинигэтигэр киирбитэ.

Эһэбит Семен Назарович бөҕө-таҕа, үлэни-хамнаһы, айаны-сырыыны кыайар буолан Ааллаах Үүҥҥэ таһаҕас таһыытыгар, көмүстээх бириискэлэргэ, тааҥнаах, муустаах үрэхтэри, хайа кыбычыын суолларын, кутталлаах дабааннары туоруурга эр киһи хоһууна буолан сылдьыбыт. Ат кыайан туораабат түгэнигэр, таһаҕаһы бэйэтэ сүгэн-көтөҕөн туоратара дииллэрэ. Кини Японияны утары сэрии кыттыылааҕа, мэтээлинэн наҕараадаламмыта. Эһэбит сэрииттэн эргиллэн кэлээт эйэлээх-уйгулаах олоҕу уһансан барбыта.

Эбэбит, эһэбит бүтүн олохторун колхоз туһугар анаабыттара, үлэһит, тулуурдаах, эрэллээх, сырдык ыралаах буоларга оҕолорун үөрэппиттэрэ, сиэннэрин ииппиттэрэ.

                            Вера Слепцова, Татьяна Олейникова, сиэннэрэ