Күн-күбэй ийэм Мэҥэ Хаҥалас оройуонун Табаҕа нэһилиэгэр холкуостаах дьиэ кэргэнигэр төрөөбүтэ.

Аҕата Семен Назарович, күүстээх-уохтаах киһи, Ааллаах Үүҥҥэ таһаҕас таһыытыгар биригэдьииринэн сылдьыбыта, Япония сэриитин кыттыылааҕа. Ийэтэ Татьяна Ивановна, холкуос ыанньыксыта, Мэҥэ Хаҥалас улууһун Бочуотун кинигэтигэр киирбитэ. Дора – ыал улахан оҕото, икки быраата – Тит, Тимофей финансовай техникуму ситиһиилээхтик бүтэрбиттэрэ, балта Мария холкуоска үлэлээбитэ. Кинилэр оҕо саас үтүөтүн билбэккэ, сэрии саҕана улахан дьону кытта тэҥҥэ холкуоска араас үлэни толорбуттара. Бары үтүө суобастаахтык үлэлээн үлэ уонна  тыыл  ветерана буолбуттара.

Дора Семеновна бииргэ төрөөбүттэринээн: бырааттара  Тит, Тимофей, балта Мария

Ийэм Табаҕа оскуолатын бүтэрээт, Дьокуускайга медучилищеҕа үөрэммитэ. Онтон 22 саастаах киһиэхэ улахан эппиэтинэстээх үлэ сүктэриллэр, Партия куораттааҕы кэмитиэтин учуот секторын статистигынан ылаллар. Ити 1952–1962 сылларга, барыта 10 сыл үтүө суобастаахтык үлэлээн, элбэх үчүгэй дьону кытта алтыспытынан киэн туттара, аҕа саастаах дьон сүбэлэринэн-амаларынан олох, үлэ үөһүгэр сылдьыбытыттан өрүү астынара.

1963 сылтан Саха государственнай университетыгар сэкирэтээринэн ылыллыбыта. Онтон ыла 1998 сылга диэри 35 сыл университекка тохтоло суох үлэлээбитэ. Үгүс устудьуон ыччаты, преподавателлэри кытта алтыһан, кинилэр ытыктабылларын, үтүө сыһыаннарын олоҕун тухары билэн-көрөн ааста.

Ийэм үтүө аата үс  үйэҕэ ааттаныа, муударай сүбэтэ биһиэхэ суон дурда, халыҥ хахха буолан олохпутун билигин да араҥаччылыыр.

Оксана Баишева-Слепцова, кыыһа