Самсонова Татьяна Петровна 1927 сыллаахха 1 Күүлэт нэһилиэгэр Бүлүү оройуонугар төрөөбүтэ. 4 кылаас үөрэхтээх. Сэрии сылларыгар 14-19 саастаах буолан улахан дьону кытта тэҥҥэ хонуу, ферма үлэтигэр сылдьар. Олоҕун тухары фермаҕа ыанньыксытынан, сүөһү көрүүтүгэр үтүө суобастаахтык, бэриниилээхтик үлэлээбитэ. Оччотооҕу сыралаах үлэтэ үрдүктүк сыаналанан Сталин төбөлөөх мэтээллээх, онон киэн туттара. 1972 сыллаахха туруу үлэһит Москва куоракка Бүтүн Союзтааҕы Норуот хаһаайыстыбатын быыстапкатыгар сынньана барар чиэскэ тиксибитэ, ол үлэ киһитин сыаналаабыттарыттан Татьяна Петровна улаханнык үөрбүтэ, дьолломмута. 40-ча сыллаах ситиһиилээх, бэриниилээх үлэтигэр махтанан олохтоох нэһилиэк салалтата босхо дьиэ тутан биэрбиттэрэ уонна бочуоттаах сынньалаҥҥа атаарбыттара. Үс оҕо тапталлаах ийэтэ, хас да сиэн эйэҕэс эбээтэ Самсонова Татьяна Петровна 1998 сыллаахха күн сириттэн барбыта.