Никонова Дарья Афанасьевна 1930 сыллаахха кулун тутар 18 күнүгэр Мэйик – Таатакаан нэһилиэгэр Күөбүргэҥҥэ Никоновтар дьиэ кэргэннэригэр иккис оҕонон күн сирин көрбүтэ.
Ийэтэ – Никонова Екатерина Иннокентьевна – фермаҕа ыанньыксыттыыр, аҕата – Никонов Афанасий Фомич – аҥаар атаҕа суох буолан үлэлээбэт, ол да буоллар инбэлииппин диэн таах олорбот этэ, куобахтаан, туһахтаан дьонун иитэрэ.
Дарья Афанасьевна Күөбүргэҥҥэ 4 кылаастаах оскуоланы бүтэрэн баран, «Рабочай» колхозка ынах ыаччынан уонна ньирэй көрөөччүнэн үлэлиир. Үлэлэрэ олус ыарахан этэ: отторун оҕуҺунан бэйэлэрэ тиэнэллэрэ, ынах сааҕын бэйэлэрэ балбаахтаан бааҺынаҕа тиэйэллэрэ.
1951 сыллаахха 21 саастааҕар Чаяндаттан төрүттээх Колосов Николай Ивановичка кэргэн тахсар (уус идэлээх Колосов Иван Дмитриевич уола). Холбоһон баран иккиэн колхозка үлэлииллэр. Кинилэр 6 оҕолоноллор.
1963 сыллаахха Орто Наахараҕа көһөн кэлэн баран пекарняҕа килиэп астааччынан үлэлээбитэ, онтон оскуола интернатыгар повардаабыта.
Аҕа дойдуну көмүскүүр Улуу сэрии саҕаламмыт кэмигэр Дарья Афанасьевна баара - суо5а 11 саастаах, сибэкки курдук саҥа тыллан эрэр кыыс оҕо этэ. Ол да буоллар, оччотооҕу кэм оҕолорун кытта улахан дьону кытта тэҥинэн, Күөбүргэҥҥэ баар «Рабочай» колхозка үлэлээбитэ. Оҕолор хортуоппуй олордоллоро, от үлэтигэр эриллэллэрэ. Иискэ талааннаах буолан, кырдьаҕас эмээхситтэри кытары фроҥҥа тирии имитэн, халын таҥаһы тигэн ыыталлара.
Ити курдук, Дарья колхоз ыарахан үлэтигэр эриллэн, сэрии кэмигэр ойор-тэбэр оҕо сааһа ааһан, бары үлэни кыайар дьулуурдаммыта, ыарахаттаратан чаҕыйбат майгыламмыта. Оҕолоруттан улахан кыыһа Евдокарова Надежда Николаевна. Кини дьааҺыла5а, фермаҕа үлэлээбитэ, онтон пенсияҕа тахсыар дылы оскуолаҕа муоста сууйара. Кини үс кыыстаах, 10 сиэннээх. Иккис о5ото – Спиридон Николаевич. Киномеханигынан улэлиир, билигин таксистыыр. Үс о5олоох, 6 сиэннээх.Үһүс о5ото – Емельян Николаевич. Милиция подполковнига. Пенсия5а тахсыар диэри Жатайга милиция начальнигынан үлэлии сылдьыбыта. Олохтон туораабыта. Кини икки о5олоох, икки сиэннээх. Төрдүс оҕото – Полина Николаевна. Кини Дьокуускайдаа5ы кырдьа5астар дьиэлэригэр улэлиир. Биир о5олоох, икки сиэннээх. Бэһис о5ото Федора Николаевна биэс оҕотун кытары былаҕайга былдьанан соһумардык олохтон туораабыта. Биир кыыһын эбэм көрөн-истэн киһи гыммыта. Кыра оҕото Марина Ленскэй куоракка «Газпром” тэрилтэтигэр бухгалтерынан үлэлиир. Икки оҕолоох, икки сиэннээх.
Дарья Афанасьевна тулаайах хаалбыт сиэнин Дашаны кырдьан баран бэйэтэ иитэн-көрөн, сиэннэрин бүөбэйдэһэн баран, 2010 сыллаахха өлбүтэ.
