Мин Үөһээ Бүлүү оройуонун I Хоро нэһилиэгэр үөрэҕэ суох колхозтаах ыалга 1928 сыллаахха төрөөбүтүм. Аҕабыт Давыдов Федот Петрович Кураанах Алаас диэн сиргэ «Өктөөп кыайыыта» диэн ааттаах колхоһу саҥа тэрийэн бэрэссэдээтэлинэн үлэлии сылдьан, ыалдьан 40 сааһыгар өлбүтэ. Ийэбит Давыдова Мария Васильевна колхоз стахановеһа этэ. Үс кыыс оҕолоохторо. Аҕабыт төһө да ыалдьан инвалид буолан олордор, улахан кыыһын Павланы Бүлүү училищетыгар үөрэттэрбитэ. Аҕабыт өлбүт сылыгар үөрэҕин бүтэрбитэ.
Ийэбит огдообо хаалан баран биһигини, эдьиийбин Марияны уонна миигин, эмиэ Бүлүү училищетыгар үөрэттэрбитэ. Биһиги үөрэнэр кэммитигэр Аҕа дойду сэриитэ буолан уонна сут-кураан сатыылаан, дьон олоҕо улаханнык айгыраабыт бириэмэтэ этэ. Эдьиийим Мария 1942-43 сылларга, мин 1943-46 сылларга үөрэммиппит. Онон тоҥору, аччыктыыры, аас-туор олоҕу билэн улааппыппыт. Хата төрөөбүт нэһилиэкпитигэр оҕуруот аһын арааһа бары үчүгэйдик үүнэр буолан, аччыктаан өлүү тахсыбатаҕа. Билиҥҥи агрономнартан итэҕэһэ суох сири оҥорон, үрдүк үүнүүнү ылар оҕуруотчут оҕонньоттор Егоров Харлампий, Павлов Василий үлэлээн-хамсаан, дьону үлэлэтэн олохтоох Хоролору эрэ буолбакка, өрүс уҥуоргу нэһилиэктэри бары абыраабыттара. Павлов В.В. (Баһыылаах) хойут ВДНХ барар чиэскэ тиксибитэ. Кинилэри урут Хороҕо олоро сылдьыбыт кытайдар, кэриэйдэр оҕуруот аһын олордорго, көрөргө-харайарга үөрэппиттэр. Ийэбит хоһуун, үлэһит дьахтар буолан иэдээннээх аас-туор дьылларга үөрэттэрбитигэр ийэбитигэр махталбыт улахан.
1946 сыллаахха үөрэхпин бүтэрэн кэлэн төрөөбүт нэһилиэкпэр 1946-50 сылларга учууталынан, кэлин сэбиэдиссэйинэн үлэлээбитим. Онтон 1951-57 сылларга Мэйик начальнай оскуолатыгар бастаан сэбиэдиссэйинэн, кэлин учууталынан үлэлээбитим. Ол саҕана нулевой кылаас аһыллыбыта, онон начальнай оскуола биэс кылаастаммыта. Оскуолаҕа икки учуутал үлэ-лиириттэн биирэ үс кылааһы балтараа сменанан үөрэтэрэ. Оскуола материальнай баазата быстар мөлтөҕө. Хороҕо былыргы баай ыал дьиэтигэр (Чиряев Георгий Николаевич дьиэтэ), Мэйиккэ икки ампаары холбоон тутуллубут, бөкүнүк мас истиэнэлээх дьиэҕэ үлэлээбиппит. Көрдөрөн үөрэтэр пособие олох суоҕа, оннооҕор географическай каарта аҕыйаҕа. Нагляднай пособиены бэйэбит оҥосторбут. Ол да гыннар, үөрэҕи билии бырыһыанынан, үчүгэй оскуолалар ахсааннарыгар сылдьарбыт. Хороҕо Чиряева М.Г., Кетехова М.В., Мэйиккэ Евдокимова М.К., Жендринскэй П.П., Матвеев Н., Капустина М.С. бииргэ үлэлээбиппит. 1957-60 сылларга Хороҕо үлэлиирбэр оскуолабыт аҕыс кылаастаах этэ, директорынан Бойтунов А.А. үлэлээбитэ.
Семейнэй балаһыанньаннан 1961 сыллаахха оройуон киинигэр көһөн кэлбиппит. Оскуолаҕа миэстэ суох буолан туберкулезнай санаторийга воспитателинэн киирбитим уонна пенсияҕа тахсыахпар диэри 19 сыл үлэлээбитим. Онон уопсайа 34 сыл оҕону иитиигэ үлэлээбитим. Төһө да медицина тэрилтэтигэр көстөрбүн син биир оҕо иитиитигэр (учуутал миэстэтигэр) үлэлээбитим.
Кэргэмминээн Прокопьев Анисим Григорьевичтыын алта оҕону төрөтөн, үөрэттэрэн, ыал оҥортообуппут. Биэс оҕобут университет араас факультеттарын (история, география, биология, математика, физика) бүтэрэн, билигин олох уларыйан, иккис үөрэх ылынан, экономика араас салаатыгар үлэлии сылдьаллар. Дьиҥэр былаас уларыйбатаҕа буоллар бары учуутал буолуохтаах этилэр.
Биһиги аҕас балыстыы Павла, Мария уонна Екатерина Давыдовалар үһүөн үйэбит тухары оҕону үөрэтиигэ, иитиигэ үлэлээн пенсияҕа тахсыбыппыт. Улахан эдьиийим Павла Федотовна уонна мин Екатерина Федотовна дойдубутугар Үөһээ Бүлүүгэ, орто кыыс Мария Федотовна Бүлүү Мастааҕар, Кыргыдайыгар, Үгүлээтигэр 41 сыл учууталынан үлэлээбитэ. Онно ыал буолан элбэх оҕолонон олорон ыалдьан 64 сааһыгар өлбүтэ. Улахан эдьиийим Павла Федотовна оҕолорунаан, сиэннэринээн уопсай педагогическай ыстааһа 119 сыл, орто эдьиийим кэргэнинээн, кийииттэринээн, оҕолорунаан, сиэннэринээн 179 сыл, онтон мин оҕолорбунаан, сиэннэрбинээн, кийииппинээн 113 сыл педстажтаахпыт.
Биһиэхэ үөрэммит оҕолор норуот хаһаайыстыбатын бары салаатыгар үлэлээбиттэринэн уонна үлэлии сылдьалларынан киэн тутта саныыбыт, үөрэбит. Билигин бэйэлэрэ эбээ-эһээ, өссө хос эбээ-эһээ буолбут сааһырбыт, пенсионер дьоннор. Мин кинилэргэ дьолу-соргуну, айымньылаах үлэни, доруобуйаны баҕарабын.
